Ana bocah jenengé Yadi. Nakalé pol. Umuré ya tengahan kira-kira 16 taun. Gunané nglayab wengi, bali-bali lagi mabok, mbuh mabok gadung apa mabok ciu.
Rama biyungé ngasi kesuh trus isin karo tangga teparo, mergané Yadi nék bali mabok cokan ngorong-ngorong brecuh ora karuan…
Akhire sewijiné dina saking gempungé ramané ngundang Yadi dijak kandah.
Rama: “Yad, ngénéh njagong. Ramamu rep ngomong..”
Yadi: “Ngomong apalah, ma? Ndhasku mumet koh..”
Rama: “Gyéh, nyong rep takon. Kowé mbendina mabok kaya kuwé karepmu apa jané? Isin nyong karo biyungmu…”
Yadi: “Urusanku koh. Mabok apa ora ya urusanku..”
Rama: “Owalah Yad, Yad… Nék arep nganggo urusanmu ya aja nang umah koh, lunga! Ramamu gemiyén wareg dadi tukang mabok, langka apiké, Yad. Isin tok..”
Yadi: “Eleh..rika gemiyén tukang mabok, ma?”
Rama: “Mbok ora percaya takon maring calo terminal, supir, kenét, ngasi pulisi bé wareg ngurusi ramamu nék mabok. Tapi ya kuwé langka apike nggane, Yad…isiin…”
Yadi mbasan meneng, karo mbatin “Jebule ramane ganu anu dudeng mabok ya..”
Pas dina Kemis Yadi maring terminal, jagongan. Kemutan omongane ramane njur takon maring Kaki Sarmad calo lawas.
“Mad, apa ramaku gemiyen tulang mabok?”
Sarmad njawab “Hoolah.. Sapa sing ora ngerti ramamu, Yad. Mabokané ill…”
Trus Yadi takon pulisi, kenét supir. Jawabané pada kabéh. Yadi dadi kéder karo ramané.
Pas njagong nang bakul wédang téh Yadi takon uga pada. Jawabané bakul téh…”Owalah Yad, Yad…ramamu langganan mabok mbendina. Aku sing gunané gawé teh panas nggo nambani…”
“Hah? Nambani?”, Yadi motong critané.
“Iya Yad, pokoké aben numpak bis mbuh adoh mbuh pérek mesti ramamu mabok. Mulané supir apa kenét bis wis pada apal, nék ramamu numpak mesti pada gagéyan sangu pasir nang kresek. Nggo ngurugi utah-utahané ramamu, Yad. Ngisin-isina yakin. Lha siki dénéng ora tau katon maning ramamu, Yad? Séhat mbok?”
Yadi langsung lunga klius. Ra sida bangga ming ramané., tapi malah isin. Jebul dhéwéké anaké tukang mabok neng bis… 😀 😀
